UNED Ourense pecha o 17 de maio, Día das Letras Galegas

A xornada festiva estará dedicada ao valdeorrés Florencio Delgado Gurriarán, poeta republicano e galeguista.

OURENSE, 16 de maio de 2022. Este martes 17 de maio, Día das Letras Galegas, as instalacións de UNED Ourense estarán pechadas durante toda a xornada festiva. Como sabedes, este 17 de maio está dedicado a Florencio Delgado Gurriarán (Córgomo, Vilamartín de Valdeorras, 27 de agosto de 1903 - Fair Oaks. Estados Unidos, 14 de maio de 1987). Entre a súa obra poética salientamos aquí este poema:

Louvanzas dos nomes enxebres

Volten, de Valdeorras, os nomes xenuinos:

Non máis “Correjanes” nin “vega Molinos”;

sí Veiga Muiños e máis Correxais,

pois xa os “castrapismos” están por demáis.

Arriba Penouta e abaixo “Penota”

que é nome en “castrapo” e rima con “jota”;

afora “Jagoaza”, nome cacofónico,

adiante Xaguaza, enxebre i eufónico.

Non trocar por feles os galaicos meles,

pronunciando “El Barco”, “La Puebla” e “Bajeles”

e “Vega de Cabo”, “Villoria”, “Otarielo”

e “Puerto Morisco” e “Repuricielo”

e ata, Deus me salve, nomeando a Fiais

en “supercastrapo”,decíndolle “Hilais”.

Hai xentes capaces (é cousa de rir)

de, ao povo de Córgomo, “Kuérgamo” decir;

hai xentes capaces (cousa é pra chorar)

de, ás mesmas Gralleiras, “Grajeras” chamar

e, de Rodeleira, facer “Ruedelera”

(¿Víchedes vosoutros cousa máis pavera?).

¡Qué Deus lles perdóe a feble cultura

aos que esmendrellaron a nomenclatura,

traducindo os belos nomes de Valdeorras

ao feio “castrapo”, da linguaxe as borras,

xerigonza, xiria, xermanía impura

que é , do castelán, a caricatura!

Xentes valdeorresas, voltade a eufonía

dos nomes antergos, baril fidalguía.

¡Que na nosa fala, de fina enxebreza,

de lene dozura, de egrexia nobreza,

do noso Valdeorras, benquerido lar,

os povos e vilas volvamos nomear!

Guadalajara, Nova Galiza, Nadal do 1978. De O Soño....

UNED Ourense

Comunicación