Psychlab, un laboratorio virtual para estudar o cambio psicolóxico
A Facultade de Psicoloxía da UNED presentará este proxecto nunhas xornadas o día 27. O laboratorio está desenvolvido polo Grupo de Investigación Construtivista da UNED.
OURENSE, 9 de maio de 2024. A Facultade de Psicoloxía da UNED vai celebrar, o próximo 27 de maio, as Xornadas de Presentación do Laboratorio Virtual Psychlab, sobre o cambio psicolóxico desenvolvido polo Grupo de Investigación Constructivista (GICUNED). Este laboratorio, contén ferramentas para a exploración do Sistema de Significados Persoais, avaliación da súa estrutura, representación do sistema a través de Mapas Cognitivos Borrosos e as súas dinámicas de cambio a través de gráficos de comportamento vs. tempo que permiten simular a evolución do Sistema mediante un modelado matemático e identificar trabas psicolóxicas que dificultan o cambio. É un espazo de uso aberto para investigadores, clínicos, estudantes e usuarios en xeral que queiran explorar a estrutura e dinámicas do Sistema de Significados Persoais dun individuo particular ou paciente. O laboratorio é un espazo ideal para quen queira estudar, avaliar e explorar o cambio psicolóxico.
Á vez que se presenta unha gran cantidade de análise e índices de avaliación, móstrase un espazo de experimentación, no que se pode explorar como evolucionaría o Sistema se se realizan cambios nos constructos elixidos. 
O Grupo de Investigación Constructivista da UNED vén desenvolvendo o seu labor de investigación na exploración do mundo de significados persoais dos individuos, con actuacións específicas na exploración da estrutura cognitiva de suxeitos clínicos e non clínicos, estudos sobre complexidade cognitiva, así como a exploración de significados relacionados con problemáticas de saúde específicas, como a adquisición de hábitos saudables, significados asociados á implantación da lactación materna, valoración e atribución de significados das distintas partes do corpo en mulleres mastectomizadas, etc, e a súa aplicación para o traballo psicoterapéutico.
Para a exploración do mundo de significados utiliza tanto a técnica de reixa, como técnicas narrativas. Desde o grupo desenvolvéronse protocolos específicos de utilización da Técnica de Reixa para xerar mostras homoxéneas de análises, así como ferramentas para avaliar a calidade dos datos obtidos e ferramentas para a exploración do cambio dos significados persoais ao longo do tempo e detección de cambios atípicos. Conta cunha base de datos de máis de 12.000 entrevistas. 
O equipo
Os membros de GICUNED son doutores expertos no estudo dos sistemas de construción de significados persoais, ou doutorandos que están a realizar as súas teses de doutoramento sobre iso, na súa gran maioría. Un dos puntos fortes deste equipo de traballo é o seu carácter multidisciplinar. Conta con membros que sendo psicólogos tamén son enxeñeiros, o que axuda na planificación e desenvolvemento de software para os seus propósitos de investigación. Tamén, desde disciplinas aplicadas ou sanitarias, o equipo dispón dunha médico e unha enfermeira, así como de psicólogos clínicos que axudan na posta a proba dos modelos de representación mental que desenvolvemos, con pacientes clínicos tanto en contexto hospitalario público, como clínico privado. 
Podes seguir as xornadas tanto de maneira presencial desde a Facultade de Psicoloxía, como en liña (tamén quedarán gravadas en Canle UNED). As prazas de asistencia presencial son limitadas, rexístrate para que podas ter acceso a unha delas e poder xestionar o almorzo de media mañá. Se decides seguilo de maneira en liña rexístrate tamén para poder enviarche un certificado de asistencia.
Máis información sobre o Psychlab aquí.
UNED Ourense
Comunicación
