O director de UNED Ourense, premio Alecrín de Investigación

23 de julio de 2022

A Federación de Entidades Culturais Galegas en Cataluña (FEGALCAT) fai públicos os 14 galardóns que serán entregados nun acto previsto no Teatro Principal de A Estrada o 10 de agosto.

Ourense, 23 de xullo de 2022. A Federación de Entidades Culturais Galegas en Cataluña, FEGALCAT vén de facer pública a acta da súa asemblea xeral extraordinaria celebrada con motivo do Día das Letras Galegas de Barcelona 2022. Nela acordouse a entrega dos Premios Alecrín 2022 ás seguintes 14 persoas físicas ou xurídicas:

Alecrín de Literatura, a Rexina Vega pola súa traxectoria literaria e polas diversas investigacións sobre a figura de Álvaro Cunqueiro.
Alecrín de Comunicación ao xornalista Martín Fernández Vizoso polo seu traballo na defensa da memoria da emigración galega, en xeral e dos emigrantes de Ribadeo en particular.
Alecrín de Promoción Cultural a Nordesía Produccións polo seu traballo de desenvolvemento de eventos artístico-musicais que fomentan e recollen a diversidade cultural.
Alecrín de Arte a Ramiro Cimadavila pola súa traxectoria persoal en pintura, e coa diáspora galega en Cataluña.
Alecríns de Empresa ao conglomerado empresarial AUSAMA, AUSAVIL e Irmáns Villar – Nearlamela, e á empresa Construccións Bamarti polo seu labor na defensa e apoio á lingua e cultura galegas.
Alecrín de Música a Benito Villar Fernández pola súa traxectoria neste campo.
Alecrín en Defensa do Gallego ao programa Dígocho Eu da TVG.
Alecrín de Investigación ao director de UNED Ourense, Jesús Manuel García Díaz.
Alecrín de Arte Audiovisual ao humorista Isi.
Alecrín de Música Tradicional ao Grupo Tequexetéldere da Estrada no seu aniversario.
Alecrín Escritora Local, a Rosalía Morlán que representou a Galicia en varios días de Sant Jordi.
Alecrín de Emigración a José María Vila Alén ex-presidente do Centro Galicia de Buenos Aires, persoa moi relevante na colectividade galega en Arxentina.
Alecrín Berciano á Empresa Vallelongo polo seu apoio a ASOBECAT.
Alecrín Empresarial en Cataluña a Clean Channel.

Tamén se aprobou por unanimidade o nomeamento de Socio de Honra a Pepe Ares (ex-presidente de Toxos e Xestas de Barcelona) e Eduardo Méndez (ex-presidentes de A.C.G. Saudade); do mesmo xeito acordouse entregar a Medalla de Ouro da FEGALCAT a título póstumo a Mónica González López, segundo o artigo 14.5 dos Estatutos de FEGALCAT.

O director de UNED Ourense agradece este recoñecemento e engade que "foi toda unha sorpresa coñecer a miña presenza nesta edición dos premios do importante colectivo cultural en Cataluña". O labor investigador do doutor Jesús Manuel García Díaz desenvólvese en Galicia e entre os varios traballos por el elaborados destaca a importante investigación levada a cabo para estudar a depuración realizada no primeiro franquismo contra todos os mestres da escola nacional en todo o territorio da provincia da Coruña. É o traballo máis completo neste sentido sobre unha provincia galega. "Esa foi a miña tese e envío un moi cordial agradecemento ao director da mesma, Julio Prada Rodríguez", sinalou o premiado". Á parte de varios artigos en revistas, García Díaz ultima o seu cuarto libro de Historia e ten en proxecto dous máis. Con este galardón o director de UNED Ourense suma outros dous: o Premio de Xornalismos José Aurelio Carracedo 2008 e o Premio Luís Tilve en Investigación e Divulgación Histórica de Galicia en 2018.

A entrega dos Premios Alecrín deste ano farase nun acto cultural no Teatro Principal da vila pontevedresa de A Estrada o día 10 de agosto ás 12. 00 horas. Organiza FEGALCAT, colaboran a Xunta de Galicia, a Generalitat de Cataluña, a Diputación de Barcelona, o Axuntamento de Barcelona e o Concello de A Estrada.