O director da UNED Ourense falou en Santiago de Compostela sobre os mestres depurados administrativamente no primeiro franquismo
García Díaz manifestou que nese concello galego foron purgados 145 docentes nunha provincia na que o total de expedientados foi de 2.061
OURENSE, 8 de outubro de 2019.- O director do Centro Asociado á UNED en Ourense, Jesús Manuel García Díaz, pechou unha xira polas tres principais cidades coruñesas coa presentación do seu libro sobre a depuración do maxisterio nacional nesta provincia galega. Despois de facelo, dando ademais unha conferencia en cada ocasión, dúas na Coruña e en Ferrol, e tocou esta semana a quenda a Santiago, en cuxa librería Couceiro tivo lugar o acto. O libro deriva da tese doutoral de García, que na Uvigo logrou a máxima cualificación (sobresaínte cum laude), ademais de recibir o Premio Luís Tilve de Investigación e Divulgación Histórica en Galicia. Precisamente esta Fundación organizou a cita compostelá.
O autor da obra repasou o proceso depurador dos mestres de todos os municipios da Coruña, que hoxe constitúe o estudo máis completo sobre esta faceta da represión franquista. Dita represión ten unha vertente física, outra económica e unha terceira administrativa, que é na que se engloba o estudo de García Díaz.
Para o caso concreto do municipio de Santiago , que en 1936 tiña 38.270 habitantes, foron expedientados 145 docentes. Pola documentación sábese que foron castigados 17 mestres e absoltos 126. Quedan outros dous docentes dos que non é posible coñecer como finalizaron os seus respectivos expedientes de depuración. En Santiago había 71 mestres . A cifra ata alcanzar os 145 débese á purga feita tamén cos alumnos da Escola Normal do Maxisterio.
Este traballo minucioso contempla, para toda a provincia da Coruña, un total de 2.184 mestres dos que consta a depuración administrativa de 2.061. A investigación apóiase nunha base de datos que presenta preto de 300.000 rexistros, o que permite ter unha visión completa do sucedido a todos e cada un dos docentes que instruían a nenos e a nenas nas escolas tanto das cidades como de todo o rural coruñés, o cal permite coñecer a idiosincrasia dese territorio, que dorme nos miles de documentos tratados e que se conservan na súa gran maioría no Arquivo Xeral da Administración ( AGA) situado en Alcalá de Henares (Madrid).
