"Dádevos conta da importancia e a oportunidade que tedes de facer desde xa investigación"

7 de marzo de 2024

O director de UNED Ourense felicitou á comunidade escolar do Guilleme Brown, a cuxa inauguración da XXII Expociencia foi convidado xunto ao Concello, a Xefatura Territorial de Educación e o Parque Tecnolóxico de Galicia.

OURENSE, 7 de marzo de 2024. O Colexio Guillelme Brown celebra este xoves a súa 22 edición de Expociencia cunha importante exhibición de proxectos de investigación dos seus alumnos, desde Educación Infantil ata cuarto da ESO. Todo o centro revolucionouse para mostrar un amplo abanico de experimentos que fan as delicias de pais e visitantes. A dirección, encabezada por Yolanda Valeiras Vázquez, convidou nesta ocasión ao Concello de Pereiro, en nome de cuxo alcalde asistiu o concelleiro Manuel Doval Soto; a Educación, acudindo o seu xefe territorial, Jorge Rubén Sampedro Grande; ao director de UNED Ourense, Jesús Manuel García Díaz; o inspector de Educación, Enrique Álvarez Roales e ao director do Parque Tecnolóxico de Galicia, Javier Taibo Gallego.

A inauguración tivo lugar cara toda a comunidade escolar, no patio cuberto, que conta con bancadas. En primeiro lugar, un novo estudante interpretou unha peza para guitarra, ao que seguiu outro, que tocou o piano. A continuación, Valeiras deu o micrófono ao director de UNED Ourense, quen felicitou a todo o colexio por esta "festa da ciencia, da investigación. Que felicidade observar que practicades investigación desde o voso nivel escolar, desde os máis pequeniños ata os adolescentes grazas ao labor impresionante que fan os vosos profesores". Jesús Manuel García lembrou con eles a última sesión da Aula de Divulgación UNED que a nosa universidade mantén, entre outros, co centro Guillelme Brown: "aínda non hai un mes os de Secundaria puidestes escoitar a conferencia que vos deu o paleontólogo Adán Pérez, quen vos falou de Paleontoloxía, de tartarugas, crocodilos e dinosauros fósiles, e deuvos conceptos alcanzables acerca desta interesante disciplina. Eu represento aquí á universidade pública máis grande de España, por iso en nome dos seus científicos transmítovos tamén a súa felicitación. Sabede que universidade e investigación van da man, e sen investigación non hai universidade. Así que dádevos conta da importancia e a oportunidade que tedes de facer desde xa investigación. Estades a adquirir unha inercia, un coñecemento e hábitos que a medida que vaiades ascendendo no sistema escolar váisevos facer habitual, o cal é importantísimo, de gran axuda cando poñades os vosos pés na Universidade, dentro duns anos".

O director de UNED Ourense díxolles que estaba a desexar ir ver os seus traballos no pavillón polideportivo. "O ano pasado a vosa exposición estivo fantástica e seguro que nuns minutos gozaremos ao grande coa 22 edición. Parabéns a todos vós e a seguir traballando e investigando, porque é ilusionante adquirir novos coñecementos, e ata divertido. Estades a coñecer o método científico, estades a crecer pasiño a pasiño en sabedoría".

O concelleiro de Pereiro, Manuel Doval, felicitou á comunidade escolar por trabállolle que se desenvolve neste centro escolar e animounos a continuar traballando para ser futuros e bos profesionais nos distintos campos do saber. O xefe provincial de Educación, Jorge Rubén Sampedro, tamén tivo unha felicitación para o Guillelme Brown e animou aos escolares para seguir descubrindo a ciencia utilizando os diferentes pasos do método científico, desde saber formular boas hipóteses ata realizar o traballo de campo, obter resultados e comunicalos. E díxolles que na nosa vida diaria pasamos por alto detalles que son ciencia como o simple feito de acender a luz dunha sala, ou abrir unha billa para que salga auga. De seguido convidados, pais, escolares e profesores dirixíronse ao pavillón polideportivo para percorrer os distintos expositores onde se exhibían traballos de investigación.

Os escolares de Infantil tiñan un expositor titulado O mundo sensorial, os de primeiro e segundo curso de Primaria centráronse en Érase unha vez...ou espazo, e ían todos ataviados con botellas de osíxeno nas costas coma se tratásese de astronautas. Os de terceiro e cuarto de Primaria apostaron por Lego Masterpiece, o crecemento das plantas, super avións, sistemas alternativos e aumentativos de comunicación; visita ás nosas hortas, monumentos do mundo, Mans de Henna e animais.

Na primeira fila: Manuel Doval, Jorge Rubén Sampedro e Jesús Manuel García; detrás, Yolanda Valeiras, Enrique Álvarez, Ángeles Garrido e Javier Taibo.

Os de quinto de Primaria mostraban a enerxía solar e o seu aproveitamento, as forzas que empregamos para aproveitar a enerxía; o poder da auga e do vento, como se produce a electricidade e a relación entre magnetismo e electricidade. Os nenos de sexto de Primaria exhibiron o funcionamento de máquinas simples, concretamente dunha cuña, rampla e panca, e máquinas complexas como guindastres e a catapulta. De igual modo explicaban con exemplos alí visibles as máquinas simples, como o torno e poleas e unha máquina complexa como unha ponte levadizo do que tiñan o modelo informático feito por eles e a maqueta en madeira e outros materiais. En Secundaria centráronse nas mulleres científicas, saber quen é quen; no léxico dos oficios tradicionais ou en aeroxeradores e produtos locais, entre outros proxectos. Tiñan un mapa das linguas europeas en perigo de extinción, un karaoke en galego; outros explicaban o funcionamento da bolsa ou a indución electromagnética sen esquecer a creación de videoxogos. Había un bioensaio para mediar a calidade da auga, un estudo dos danos no ADN ou como controlar un prototipo de minidrón con Arduino.

Daba gusto escoitar cada equipo, pois as explicacións dábanas entre todos os membros, coas mensaxes ben repartidas entre eles.