Arrancan as titorías do novo curso en UNED Ourense

30 de septiembre de 2024

Trátase dun servizo académico importante co profesorado experto nas materias dos Graos. Por outra banda, o centro universitario anima a utilizar a Sala de Estudo da Biblioteca, que abre 12 horas ao día, de luns a venres. O periodo de matriculación segue aberto ata o 22 de outubro,

OURENSE, 30 de setembro de 2024. Co inicio das titorías, UNED Ourense lembra aos seus estudantes a importancia de utilizar este servizo co profesorado titor seguindo o calendario semanal que corresponde ás materias de cada grao. A UNED conta cunha figura docente exclusiva: o Profesor-Titor, que desenvolve a súa tarefa de forma local nos Centros e Aulas UNED repartidos por toda a xeografía nacional. Os profesores-titores traballan de forma coordinada co equipo docente das Facultades ou Escolas para orientar e apoiar aos estudantes de cada centro e facer un seguimento personalizado ao longo do curso. Os profesores-titores encárganse das titorías, xa sexan presenciais ou a través de videoconferencia, que poderán ser semanais e quincenais.

Na actualidade, a titoría presencial reforzouse grazas a sistemas avanzados de videoconferencia e taboleiros dixitais interactivos (aulas AVIP), que permiten ofrecer, ao tempo, a titoría en directo a distintos centros á vez, optimizando desta forma os recursos dispoñibles, con independencia do tamaño dos centros. Entre as súas funcións principais, e sempre en coordinación co Departamento correspondente á materia cuxa titoría imparten, destacan:

Facilitar orientacións para a preparación da materia e aclarar dúbidas de contidos
Realizar, seguir e cualificar as prácticas das materias que o requiran
Corrixir as probas de avaliación continua e explicar os criterios aplicados Informar o profesor ou equipo docente responsable de cada materia do nivel de preparación dos estudantes, especialmente a través da avaliación continua
Orientar aos estudantes para as probas presenciais
Participar no seguimento do curso virtual

Os estudantes poden comunicarse cos seus profesores-titores de forma persoal no Centro Asociado, ou a través dos foros virtuais das titorías. A razón de ser desta figura non é outra que a consciencia plena da importancia da presencialidade na formación en liña, clave do éxito da metodoloxía da UNED.

A selección dos profesores-titores realízase a través dun concurso público de méritos, atendendo aos principios de publicidade, mérito e capacidade. Todos eles están en posesión do título de Graduado, Licenciado, Enxeñeiro, Diplomado, Enxeñeiro Técnico ou equivalente relacionados coas materias que titorizan. E a gran maioría son doutores na súa materia. "É moi recomendable facer uso deste servizo, porque ao estudar sempre aparecerán dúbidas e dificultades que os profesores titores saben resolver. En UNED Ourense hai 15 salas de titorías dotadas coa tecnoloxía que lles é propia. Todas as tardes, de luns a venres, desde as 16:00 h ata as 21.00 horas leva a cabo o servizo de titorías, nos que cada estudante pode non só obter guía senón dialogar con ese profesorado sobre o tema correspondente do programa académico", sinala o director, Jesús Manuel García. "O ambiente de tarde é agradable, os estudantes teñen prazas de aparcamento e poden achegarse nunha das tres liñas de buses urbanos que pasan xusto por diante da nosa sede", engade.

Sala de estudo

UNED Ourense ofrece outro servizo como é o da Sala de Lectura e Estudo, contigua á Biblioteca. Nese espazo, que permanece todo o día en silencio, pódese organizar o estudo particular. Está dotada de conexión wifi, ten mesas inclinadas e abre de luns a venres, de 08:00 horas a 14:00 horas, e de 15:00 horas a 21:00 horas. Tanto opositores como estudantes da UNED poden utilizar esta sala e, no segundo caso, teñen a man a Biblioteca para consultar cuantos libros poidan en cada unha desas sesións de estudo. "Queremos un centro vivo, que os ourensáns saiban que hai que utilizalo, que se presta funcionalmente a iso", indica o seu director.

Lembra que estamos en pleno período de matriculación na UNED, ata o 22 de outubro.