Éxito de participación no curso que sobre violencia machista organizou a UNED en Xinzo de Limia
Con esta iniciativa docente o Centro Asociado ourensán sumouse aos actos para acabar cos atentados contra as mulleres
OURENSE, 25 de novembro de 2019.- Con cheo total de alumnos clausurouse a pasada fin de semana o curso que sobre violencia machista organizou a UNED en Xinzo de Limia. Foi un ciclo formativo de gran interese e de participación nos debates por parte dos matriculados. O venres, 22 de novembro Yerma González Hevia, psicóloga forense, activista feminista e integrante da Asociación Feminista Falando Nós, interveu para disertar sobre a prevención e erradicación da violencia machista no ámbito internacional europeo, no Estado español e nas comunidades autónomas. E o sábado a mesma relatora tratou sobre a intervención profesional desde o enfoque de xénero, explicando como detectar a violencia e como intervir, valorando o risco e os recursos asistenciais.
O curso terminou esa mesma tarde, cun achegamento á historia do feminismo, formación e estratexias dos equipos profesionais. Para clausúraa contouse coa presenza do director deste curso, o profesor Tiberio Feliz, quen transmitiu aos asistentes a filosofía que impera na Dirección do Centro Asociado á UNED en Ourense e en toda a Universidade, é dicir, estar presente en todos os recunchos da provincia con actividades de interese para a sociedade á que serve. O director de UNED Ourense, Jesús Manuel García, explicou que con esta iniciativa o Centro Asociado sumouse á xornada do Día Internacional da eliminación da violencia contra a muller, ofrecendo un curso profesional sobre esta temática tan preocupante na sociedade e contra a que todo o persoal da UNED en Ourense e A Rúa mostra a súa repulsa cara a esta lacra.
