Alumnos da UNED Senior de Ourense visitaron a exposición "Antonio Faílde e a natureza recoñecida"
A comisaria, Natalia Figueiras, guiounos nun percorrido cultural mergullándoos no universo privado do xenial escultor ourensán
OURENSE, 27 de febreiro de 2019.- Un grupo de alumnos da UNED Senior de Ourense viviu unha mañá moi cultural na cidade coa visita realizada ao Centro Cultural José Ángel Valente para ver a exposición do escultor Antonio Faílde. Antonio Faílde e a natureza recoñecida foi guiada para estes alumnos pola comisaria da mesma, a investigadora Natalia Figueiras Pimentel. Durante algo máis dunha hora foi descubrindo o xenio de Faílde a través do cento de esculturas en diversos materiais que son un refresco para o espírito que as admira.
Cos matriculados Senior estaba a profesora Josefina Pato. Percorreron toda a sala para ver e entender o traballo do escultor ourensán, nacido en San Lourenzo de Piñor en 1907 e falecido en 1979. Na súa obra extrae a dozura dos materiais convertida en curvas humanas que provocan encanto, intimismo, amor, beleza…
Natalia Figueiras contoulles que o escultor foi nomeado académico da Real Academia de Belas Artes de San Fernando en 1957, “co que iso suporía para os seus anos futuros como escultor, artista e mestre”. A súa obra foi exhibida en numerosas exposicións rexionais, nacionais e internacionais, tanto en vida do mestre e con posterioridade. Tamén lles contou que da obra de Faílde publicaron estudos rigorosos varios autores, entre eles María Vitoria Carballo Calero e Javier Limia Gardón. Os alumnos veteranos da UNED coñeceron a figura do mestre escultor desde unha nova visión de aproximación á súa obra, neste caso a de maior relevancia, grazas á colaboración do fillo do artista, Miguel Ángel Faílde, custodio da obra do seu pai.
Figueiras informoulles que esta exposición conta co patrocinio da Consellería de Cultura, a organización do Concello de Ourense a través do Museo Municipal “e a inestimable achega dos museos galegos colaboradores”.
Antonio Faílde e a natureza recoñecida, achéganos, dixo a súa comisaria, á parte íntima e privada do proceso creativo do autor, “desde a xestación espontánea non froito dun encargo, senón do desexo do home libre, que nos seus momentos de recollemento e diálogo interno co proceso verdadeiro da arte, enfróntase ao nacemento da obra que mellor lle representa e coñécelle, a escultura liberada de condicionantes e corpiños, que nace da natureza, porque sempre formou parte dela”. Pódense ver 120 esculturas, 120 debuxos e ferramentas orixinais do escultor, que nos axudan a visualizar o seu universo privado, “o que moi poucos tiveron a ocasión de coñecer verdadeiramente e agora bríndallenos posible, ata que regresen de novo á súa intimidade e en certo xeito ao seu perenne anonimato”, sinala Figueiras. Na escultura de Antonio Faílde danse a man “a emoción contida da expresión do corpo e a emoción exultante do proceso creador na fase de recoñecemento. Algo así como a emoción expresada nos seus dous polos de intensidade, a enerxía vital veloz do acto creativo e a quietude, acougada, serena e silenciosa do ser que habita agora nesa materia que o escultor transforma”. Foi unha mañá especial a vivida no centro cultural que os alumnos agradeceron.
